Ministria e Arsimit ka bërë të ditur se, brenda gjashtë ditëve të para pas hapjes së sistemit për aplikim në platformën e-Kosova, janë pranuar 144,337 aplikime për subvencionimin e teksteve shkollore.

Ministrja në detyrë e Arsimit, Arbërie Nagavci, përmes një postimi në Facebook, ka deklaruar se procesi po zhvillohet pa pengesa dhe deri më tani nuk janë pranuar ankesa nga prindërit.

Ajo theksoi gjithashtu se verifikimi i aplikimeve nga koordinatorët e shkollave po bëhet në mënyrë të rregullt.

“Deri më tani, janë verifikuar 73,064 aplikime, duke treguar angazhim dhe efikasitet të lartë në menaxhimin e procesit. Procesi po zhvillohet pa pengesa, dhe deri tani nuk është pranuar asnjë ankesë nga prindërit, çka dëshmon për funksionalitetin dhe transparencën e sistemit. Ky proces po realizohet me sukses në bashkëpunim me Agjencinë e Shoqërisë së Informacionit (ASHI). Verifikimi i aplikimeve nga koordinatorët e shkollave po zhvillohet në mënyrë të rregullt dhe të organizuar”, tha ajo./Arbresh.info